పాన్‌ ఇండియా స్టార్ ప్రభాస్ పుట్టినరోజు అక్టోబర్ 23న రానుంది. ఈసారి ఆయన అభిమానులకు ఇది నిజంగా పండుగ వారం కానుంది. రాబోయే సినిమాల నుండి వరుసగా అప్‌డేట్‌లు మరియు టీజర్‌లు విడుదల కానున్నాయని సమాచారం. ప్రభాస్ పుట్టినరోజు సందర్భంగా ఆయన సినిమాలపై భారీ అంచనాలు నెలకొన్నాయి.
ప్రభాస్ బర్త్‌డే స్పెషల్‌లో ప్రధాన ఆకర్షణ హాను రాఘవపూడి దర్శకత్వంలో రూపొందుతున్న ప్రభాస్ కొత్త చిత్రం ‘ఫౌజీ’ (తాత్కాలిక టైటిల్) టీజర్ విడుదల. ఈ టీజర్ అక్టోబర్ 23న ఉదయం 11:07 గంటలకు విడుదల కానుంది.
సినిమా ఆర్మీ నేపథ్యంతో ఉండబోతుందని, ప్రభాస్ ఇందులో ఒక శక్తివంతమైన పాత్రలో కనిపించనున్నారని సమాచారం. సీతారామం ద్వారా తన సున్నితమైన కథనానికి గుర్తింపు తెచ్చుకున్న హాను, ఈసారి ప్రభాస్ కోసం భావోద్వేగం, యాక్షన్, దేశభక్తిని మిళితం చేసిన కథను సిద్ధం చేసారని తెలుస్తోంది.
ప్రభాస్ అభిమానులు ఎంతో ఆసక్తిగా ఎదురుచూస్తున్న మరో సినిమా ‘స్పిరిట్’ గురించి కూడా పెద్ద అప్డేట్ వచ్చే అవకాశముంది.
ఈ చిత్రాన్ని అర్జున్ రెడ్డి, అనిమల్ వంటి హిట్ సినిమాలతో ప్రసిద్ధి చెందిన సందీప్ రెడ్డి వంగా దర్శకత్వం వహిస్తున్నారు. ప్రభాస్ కెరీర్‌లో అత్యంత క్రేజీ ప్రాజెక్ట్‌గా భావిస్తున్న ఈ సినిమాలో ఆయనను పూర్తిగా కొత్తగా చూపించబోతున్నారట.
ప్రభాస్ హారర్ కామెడీ రొమాంటిక్ ఎంటర్‌టైనర్ ‘ది రాజాసాబ్’ నుండి కూడా కొత్త పోస్టర్ లేదా గ్లింప్స్ రానుందని టాక్.
మారుతి దర్శకత్వంలో తెరకెక్కుతున్న ఈ సినిమా ప్రభాస్‌ను తిరిగి ఫ్యామిలీ, కామెడీ, మాస్ ఎంటర్‌టైన్మెంట్ జానర్‌లో చూపించబోతుంది. అభిమానుల కోసం ఇది మరో సర్‌ప్రైజ్‌గా నిలుస్తుందని సినీ వర్గాలు చెబుతున్నాయి.
ప్రభాస్ బర్త్‌డే వారంలో మరో భారీ ట్రీట్ ఎస్‌.ఎస్‌. రాజమౌళి దర్శకత్వంలోని మహత్తర చిత్రం ‘బాహుబలి: ది ఎపిక్’ మళ్లీ థియేటర్లలోకి రానుంది. అక్టోబర్ 31న రీ-రిలీజ్ కానున్న ఈ సినిమా ద్వారా అభిమానులు మళ్లీ ఆ అద్భుతమైన విజువల్ అనుభవాన్ని పెద్ద తెరపై ఆస్వాదించబోతున్నారు.
‘ఫౌజీ’ టీజర్, ‘స్పిరిట్’ అప్డేట్, ‘ది రాజాసాబ్’ పోస్టర్, ‘బాహుబలి’ రీ-రిలీజ్ ఇలా వరుస సర్‌ప్రైజ్‌లు రావడంతో ప్రభాస్ అభిమానులకు ఇది నిజంగా ఫెస్టివ్ వీక్.
